Мысырдағы қазақ студенттеріне дастарқан жайылды

Бас мүфти Наурызбай қажы Тағанұлының бастамасымен Мысыр Араб Республикасында білім алып жатқан қазақ студенттеріне Қазақстан мұсылмандары діни басқармасының атынан дастарқан жайылды.

ҚМДБ Төрағасының студенттермен кездесуі дастарқан басында жалғасып, рухани мазмұндағы әңгіме өрбіді. Кездесу барысында студенттер мәуліт жырын оқып, домбырамен күй орындап, Абай Құнанбайұлының өлеңдерінен үзінділер оқыды. Сонымен қатар, жиынға қонақ ретінде қатысқан Әл-Азхарда оқып жатқан индонезиялық студенттер Пайғамбарымызды (оған Алланың салауаты мен сәлемі болсын) ұлықтап, рухани жыр орындап, шараның көркін аша түсті.

Өз кезегінде «Талаба» қауымдастығына мүше қазақ студенттері мемлекет пен діни басқарма тарапынан көрсетіліп отырған жан-жақты қолдау мен қамқорлық үшін алғыс білдіріп, ризашылықтарын жеткізді.