Тезек төренің жұмбағы

Тезек төре сақалды кісі екен. Ол бірде тіс шұқитын ағашын қалың сақалының арасына қыстырып қойып, осыны отырғандарға жұмбақтап:

–Анау тұрған тау, тау етегі орман, сол орманда бір ұры тығылып жатыр. Оны қанша кісі барса байлап әкеледі?, – дейді.

Отырған жақсылар әрі ойланып, бері ойланып таба алмай дал болып отырғанда Бөлтірік шешен кіріп келеді.

Ол Тезек төреге:

–Әлгі жұмбағыңызды қайта айтып жіберіңізші, – дейді. Тезек жұмбағын қайта айтады. Сонда Бөлтірік шешен кідірместен:

–Тау дегеніңіз басыңыз ғой, – дейді. Тезек төре басын изейді.

–Тау етегіндегі орман сақалыңыз ғой.

Тезек төреге шешеннің сөзін тағы да мақұлдаған ишара жасайды.

–Жасырынып жатқан жалғыз ұрыңыз тіс шұқитын аршаңыз емес пе, – дейді.

Тезек төре шешенді қостап тағы да басын изейді. Сонда Бөлтірік:

–Мынау бес кісі барса, ол ұрыны ұстап әкеледі, – деп бес саусағын көрсетіпті.

«Қазақтың билері мен шешендері» кітабынан

Sunna.kz