Өскелең ұрпаққа ұлағатты өсиетін айтып, ізінен ерген жас буынға ізетін аямайтын қарттар қашан да құрметке лайық. Халқымызды өзгелерден дара ететін бір ерекшелік те осы. 

Қарияларды құрметтеу, олардың сөзіне құлақ асу – бабадан балаға сіңген қасиет. Осы орайда «Сәдуақас қажы Ғылмани» мешітінің бас имамы Хамзат Қажымұратұлы мешітке келуші қарт кісілермен кездесті.

Қариялар алдында сөз алған бас имам: «Дінімізде үлкенге құрметпен, кішіге ізетпен қарау  әрбір мұсылманның басты парызы саналады.  Ұлтымызда «Қарты бар ел – қазыналы ел» деген жақсы сөз бар. Сол үшін де қарттар біздің асыл қазынамыз, жол көрсетер ақылшымыз. Қарттарды құрметтеп,  оларға қолдан келгенше жақсылық жасау бүгінгі ұрпақтың маңдайалды міндеті», – деді. 

Кездесуде бас имам қарияларға мешіт атынан арнайы сыйлықтар табыстап, қарттардың батасын алды.

«Сәдуақас қажы Ғылмани» мешітінің баспасөз қызметі