БАҚ өкілдері Бас мешіттегі ауызашарда бас қосты (ФОТО)

Жаңартылған уақыты Мамыр 28, 2019

Кеше республикалық «Әзірет Сұлтан» мешітінде Елордамыздағы журналистер қауымы қонақта болып, «Берекелі Рамазан» дастарханынан ауыз ашты. Қазақ баспасөзінің қарымын күшейтіп, қаламды қару еткен түрлі телеарналар мен газет-журнал, сайт тілшілері бір дастархан басында бас қосып, тағылымды отырыс өткізді. Көбіне түсірілім барысында ғана жолдары түйісетін тілшілер қауымы үшін мешіттегі ауызашардың орны бөлек болғандай. «Әзірет Сұлтан» мешітінің конференц залына біртіндеп жиылған журналистердің ауызашар алдындағы жылы жүздесулері мен достық сұхбаттары, дастархан басындағы бір атаның баласындай жақындық пен ортақ пікірлер үндестігі осыны аңғартқандай.

Бас мүфти Түркия Президентімен кездесті

Мұсылман елдердің халықаралық саммиті басталды

Отанды қорғау – қасиетті парыз

Етене әріптестерімен емен-жарқын сұхбаттасып, бір жасап қалған журналистер үшін мешіт имамының уағызы да шөл қандырар рухани сусын болды. Құтты қонақтармен бірге Рамазанның 23-ші күніне аяқ басқан «Әзірет Сұлтан» мешітінің наиб имамы Бақытжан Өткелбаев отырыс барысында ұлық айдың қадір-қасиеті жайында тағылымды уағыз айтып, тілшілер қауымын тың ойларға жетелей түсті. Құран қиссаларынан мысал келтіре келіп, тілшілер қауымы үшін артылар салмақтың да, жүктелер міндеттің де қай заманда орасан екенін әсерлі жеткізді. Сондай-ақ, қолымыздағы нығметтің қадірін түсініп, бағасын білуге үндеген Бақытжан имамның бұл уағызы да журналистер үшін тағылымға толы болды.

Берекелі отырыс барысында Бас редакторлар клубының президенті Кенжеболат Жолдыбай ағамыз да көпшілікке ғибратты әңгіме айтып, отырыс сәнін арттыра түсті. Бүгінгі осындай тағылымды басқосуға ұйытқы болуға республикалық «Әзірет Сұлтан» мешітіне ризашылығын білдіріп, жылы лебізін жеткізді.