Қажылық квотасы 15 млн-ға өседі
Сауд Арабиясы жыл сайын 8 миллион қажыға қызмет көрсетеді. Келесі жылы бұл көрсеткішті 15 миллионға жеткізу үшін дайындық жұмыстарын қолға алды, деп хабарлайды Islam.ru.
Корольдіктің Қажылық және ұмра істері жөніндегі министрлігі жанындағы қажылар ісі департаментінің директоры Мұхаммед бин Абдуррахман әл-Бейджавидің айтуынша, министрлікте 2020 жылы қажылар санын 15 миллионға жеткізу бағытында жұмыстар жүргізілуде.
Ол қасиетті мекенде қажылық өтеуге келген мұсылмандар үшін қажетті жағдайдың барлығын жасауға назар аударылатынын айта келе, қызметтер ауқымы бойынша жобалар көлемі ұлғайтылып, метролар ашылып, әуе рейстері саны да арта түскенін жеткізді.
Соңғы 10 жылдың деректеріне сүйенер болсақ, Сауд Арабиясына бір жылда қажылыққа 8 миллион мұсылман келеді, ал осы бағыттағы көрсеткішті ұлғайту бағдарламасы аясында 2030 жылы қажылар санын 30 миллион адамға жеткізу жоспарланған.
kazislam.kz