Мешіт жамағаты арасында ұлттық ойындардан сайыс өтті (фото)

«Сәдуақас қажы Ғылмани» мешітінде Наурыз мерекесіне орай ұлттық спорт ойын түрлерінен жамағат арасында сайыс өтті.

Жыл сайын дәстүрлі түрде өткізіліп келе жатқан сайысқа мешіт жамағаты әдеттегідей белсене атсалысты. Мешітке мерекелік мінәжат үшін келген қала қонақтары қызықты өткен тартысты тамашалап, қатысушыларға қолдау білдірді. Халқымыздың қанына сіңген ұлттық ойындарды жаңғырту мақсатында мешіт ауласына жиылған жамағат арасында «Арқан тарту», «Қол күресі»,  «Асық ату», «Гір тасын көтеру» бойынша өзара сайыс өтті.

Мешіт жамағаты әрбір аталымға жұмыла қатысып, Наурыз мерекесінің мерейін асырды. Мерекелік сайыс нәтижесінде «жүзден жүйрік, мыңнан тұлпар» шыққан үздік жеңімпаздарға бірінші, екінші және үшінші дәрежелі дипломдар мен мешіт ұжымы атынан арнайы әзірленген сый-сияпаттар табысталды. Осылайша, Наурыз мейрамының құрметіне өткізілген ұлттық спорт сайысы мешіт жамағаты арасындағы ауызбірлік пен сыйластықты арттырып, өзара ынтымақты күшейтуге тағы бір себеп болды.

sunna.kz