Бас мүфти: «Марқұм болған дін қызметкерлерінің есімі әрдайым жадымызда қалады»

Бүгін, қасиетті жұма күні ел мешіттерінде халқымыздың руханиятына өлшеусіз үлес қосқан марқұм болған дін қызметкерлерін еске алуға арналған Құран хатым шарасы өтті.

---

Астанадағы «Әзірет Сұлтан» мешітінде Қазақстан мұсылмандары діни басқармасының төрағасы, Бас мүфти Наурызбай қажы Тағанұлы бұл игі іске орай жұма намазы алдында жамағатқа насихат айтты.

«Құрметті жамағат! Биыл Қазақстан мұсылмандары діни басқармасы өзінің 35 жылдық мерейтойын атап өтуде. Осы жылдар ішінде имам-молда ағаларымыз, ұлағатты ұстаздарымыз дін саласында елеулі еңбек етті. Сол кісілердің ықыласы мен ыждағатының арқасында біз дініміз бен сенімімізді сақтап қалдық. Қала-ауылдарымызда мешіттер бой көтеріп, дәстүріміз жаңғырды» деді Бас мүфти.

Наурызбай қажы Тағанұлы еліміздің әр өңірінде қызмет еткен марқұм дін қызметкерлерінің есімдерін атап, олардың елге, дінге сіңірген еңбегін ерекше атап өтті.

Айта кетейік, жұма күні республика бойынша 652 Құран хатым оқылып, марқұм болған дін қызметкерлерінің рухына бағышталды. Бас мүфтидің тапсырмасымен бұл игі шара еліміздің барлық облыстық орталық мешіттерінде өткізілді. Сондай-ақ, марқұмдардың жақын туыстарына ҚМДБ атынан құрмет көрсетіліп, сый-сияпат табысталды.

Алла Тағала марқұм имамдарымыз бен ұстаздарымызға рақым етіп, жұмақтан орын бергей! Әмин!