Исар – бауырыңның қалауын өз қалауыңнан жоғары қою

Исар деп мұсылман бауырыңның қалауын өз қалауыңнан жоғары қоюды айтады. Бұл бауырмалдықтың шыңы саналады. Ислам тарихының алғашқы кезеңдерінде меккелік мүшріктер мұсылмандарға қатты қысым көрсетеді. Алғашында аз болған мұсылмандар мал-мүлкін, үй-жайын тастап, Мәдинаға қоныс аударуға мәжбүр болады. Сол кезде Мәдина мұсылмандары (ансарлар) оларды құшақ жая қарсы алып, үй-жайларымен, дүние-мүлкімен, тіпті, кәсіптеріне дейін бөліп береді. Алла Тағала ансарлық сахабалардың бұл істеріне разы болып, Құранда: «Сондай-ақ өздерінде таршылық бола тұра оларды өздерінен артық көреді. Кімде-кім сараңдықтан сақтанса, міне, солар құтылушылар», – дейді («Хашыр» сүресі, 9-аят).

Аталмыш аяттың түсуіне қатысты Әбу Һурайрадан (Алла разы болсын) мынадай оқиға жеткен: «Бірде Алла елшісіне (с.ғ.с) бір адам келіп: «Мен (әбден) азып-тоздым», – дейді. Мұны естіген Алла елшісі (с.ғ.с) біреуді өзінің әйелдерінің біріне (оған тамақ алып келсін деп) жібереді. Пайғамбарымыздың (с.ғ.с) жары: «Сені ақиқатпен Жібергеннің атымен ант етемін, менде судан басқа ешнәрсе жоқ», – дейді. Оны басқа әйеліне жібереді. Ол да дәл сол жағдайды айтады. Әлгі жіберген адам осылайша оның барлық әйелін аралап шығады. Сонда Алла елшісі (с.ғ.с): «Мына адамды түнемекке кім қабылдайды?» – деп сұрайды.

Бір ансарлық сахаба: «Мен, уа, Алланың елшісі», – дейді. Әлгі сахаба оны үйіне алып келіп, әйеліне: «Алла елшісінің (с.ғ.с) қонағына құрмет көрсет», – дейді. Хадистің басқа нұсқасында әйеліне: «Сенде бір нәрсе бар ма?» – дейді.

Әйелі: «Менің балаларыма беретін астан басқа ешнәрсем жоқ», – дейді.

Сонда сахаба: «Балаларды бір нәрсемен алдандыра тұр. Егер олар тамақ жегісі келсе, ұйықтауға жатқыз. Қонақ келген кезде шамды өшіріп, біз де тамақ жеп жатқан секілді болайық», – дейді. Содан соң олар өздерінің орындарына отырады да, қонақ тамақ жеп болған соң (өздері) аш қарынмен жатады. Таң атысымен үйдің иесі Пайғамбарға (с.ғ.с) келгенде ол: «Алла сендердің түнде қонақтарыңмен қалай шығысқандарыңа разы болды!» – дейді» (Бухари, Муслим).

материал «Ислам әдептерінің энциклопедиясы» кітабынан алынды,

sunna.kz