«30 күнге 30 сұхбат» онлайн сұхбаты өтеді
25 сәуір. Нұр-Сұлтан. Sunna.kz – ҚМДБ-ға қарасты «Хикмет ТВ» студиясы Рамазан айының әр күнінде елімізге белгілі имамдар мен ұстаздардың қатысуымен «30 күнге 30 сұхбат» атты онлайн сұхбаттар жүргізуді қолға алды, деп хабарлайды muftyat.kz сайтына сілтеме жасаған sunna.kz тілшісі.
Алғашқы онлайн сұхбат кеше Нұр-Сұлтан қаласы уақытымен 20:00-де ҚМДБ Төрағасының орынбасары, наиб мүфти Ершат Ағыбайұлының қатысуымен өтті. Наиб мүфти «Ұлық айды қалай қарсы аламыз?» тақырыбында әсерлі әңгіме өрбітті.
Бүгін онлайн сұхбатты «Оразаға ниет» тақырыбы бойынша ҚМДБ Діни білім және кадр даярлау бөлімінің меңгерушісі Смайыл Сейтбеков жалғайды. Осылайша отыз күн бойы онлайн сұхбат жалғасады.
Сұхбатты күн сайын Нұр-Сұлтан қаласы уақытымен 20:00-де «Хикмет ТВ» студиясының youtube-тағы каналынан тікелей эфирде көруге болады.
Айта кетейік, «30 күнге 30 сұхбат» атты онлайн дәрістер жобасы ҚМДБ Төрағасы Наурызбай қажы Тағанұлының бастамасымен қолға алынды. Бас мүфти Президент жанындағы Орталық коммуникациялар қызметінің алаңында өткен баспасөз конференциясында «30 күнге 30 сұхбат» атты онлайн дәрістер жобасы жүргізілетінін хабарлаған болатын.