“Сәдуақас қажы Ғылмани” мешіті ашылды (ФОТО)

18 мамыр. Нұр-Сұлтан. Sunna.kz – Елімізде жарияланған төтенше жағдай және карантин режиміне орай уақытша жабық тұрған “Сәдуақас қажы Ғылмани” мешіті де бүгін жамағатқа есіктерін айқара ашты, деп хабарлайды sunna.kz тілшісі.

Алайда, мешітімізде жамағат намазы оқылмайды. Мешіт кешкі 20:00-ге дейін жұмыс істейді. Тұрғындардың қауіпсіздігі мақсатында бұл шарт ертеңгі Қадір түнінде де сақталады. Бұл жайында ҚМДБ Төрағасы Наурызбай қажы Тағанұлы Президент жанындағы Орталық коммуникациялар қызметінде тікелей эфирде өткен брифингте атап айтқан болатын.

«Биылғы Рамазанның қасиетті Қадір кеші мамыр айының 19-ынан 20-сына қараған түнге сәйкес келіп отыр. 19 мамырда мешіт таңғы сағат 7:00 мен кешкі 20:00 аралығында жұмыс істейді. Осы ретте баршаңызды Қадір кешін өз үйлеріңізде өткізуге шақырамын. Тәртіпке бағынуды сұраймыз. Бұл – сіз бен біздің, өз отбасымыз бен ең жақын туыстарымыздың денсаулығы мен өмірінің игілігі үшін қабылданған шара» деп атап өтті Бас мүфти.

Cанитарлық нормалар сақталған. Кіреберіс, Құран оқу бөлмесі мен неке қию орындарына арнайы антисептиктер қойылған. Жеке намаз оқушылар үшін мешіт жайнамаз кілемінде арнайы жасыл белгілермен  арнайы орындар белгіленіп, жамағаттың аралық сақтауына мүмкіндік жасалып отыр. 

Мешітімізде жеке намаз оқуға, Құран оқытуға және неке қидыруға болады. Қала тұрғындарынан мешітіміздің ашылуына байланысты карантин режимінің талаптарын, сақтық шараларын қатаң сақтауын талап етеміз.

Мешіттерде жеке намаз оқуға қойылатын талаптар: 

• Тек жекелеген түрде намаз оқуға рұқсат етіледі. Мешіттерде жамағатпен (бес уақыт намаз, жұма намазы, тарауық намазы) намаздар оқылмайды;
• Мешітке жеке құлшылыққа келген ерлер мен әйелдер ұзақ уақыт мешітте болмауы тиіс. Мешітте болу уақыт ұзақтығы – 15 минут;
• Намаз оқушылардың арақашықтығы 1,5 метр болуы керек және арнайы белгіленген орындарда намаз оқып, намаз оқып болған соң мешіттен бірден шығып кетуі тиіс;
• Мешітке келетін адам санын діни ғимараттың жалпы пайдалы ауданының 30 пайызынан артық толтырмауы керек;
• Мешітте қол алыспау керек;
• Мешіттерде ауа алмасу жүйесі жақсы жүру үшін барлық есіктерді ашып қою қажет;
• Әр 3 сағат сайын намаз оқитын залдарды залалсыздандыру жұмыстарын жүргізу қажет;
• Намаз оқитын залдарда имамдар және намаз оқитын адамдар міндетті түрде бетперде және медициналық қолғаппен жүруі керек;
• Жасы үлкен кісілер, денсаулығы нашар адамдар (ер және әйел) және жас балалар намаздарын үйлерінде оқығаны абзал;
• Мешіт дәретханаларын қолдану барысында арақашықтықты және сантитарлық талаптарды сақтауы тиіс;
• Мешіттің кіреберісінде тұрған антисептикалық құралдарды пайдалану қажет;
• Мешітке кіру бөлек есіктен және шығу бөлек есіктер арқылы болуы тиіс.

Мешітте Құран оқытуға қатысты талаптар: 

• Құран оқыту бөлмесіне 10 адамнан артық кіргізбеу;
• Құран оқытуға келушілердің араларында 1,5 метр қашықтықтың сақталуы және келушілердің арнайы белгіленген орындарға отыруы;
• Құран оқитын бөлмелерде имамдар және келушілердің міндетті түрде бетпердемен отыруы;
• Гигиеналық талаптарға сәйкес бата жасау (бет сипау және т.б.);
• Әр 3 сағат сайын Құран оқитын бөлмені желдетіп отыруы;
• Құран оқитын бөлмеге кірмес бұрын антисептикалық құралдарды пайдалануы;
• Құран оқитын бөлмеге кіру бөлек есіктен және шығу бөлек есіктер арқылы болуы тиіс.

Неке бөлмелеріндегі іс-шараларға қатысты талаптар: 

• Неке қиюға шариғат талаптарына сәйкес, неке бөлмесінде куәгерлерден басқа адамдар болмауы тиіс;
• Неке қиюшылардың аралары 1,5 метр қашықтықты сақтау және арнайы белгіленген орындарға отыру;
• Неке залдарында имамдардың және келушілердің бетперде және медициналық қолғаппен болу керек;
• Неке қиып болған соң бірден мешіттен шығуы керек;
• Неке қию бөлмесіне кіруден алдын антисептикалық құралдарды пайдалану қажет;
• Әр 3 сағат сайын неке залдарын залалсыздандыру қажет.